DAM
I want Peace - بدي سلام
بدّي سلام

(محمود جريري من دام يستضيف شادية منصور)



محمود جريري

صحيت اليوم لقيت حالي بصفن بمراسيم جنون

والجنون فنان يرسم ع شعبي خدود مليانه دموع

يحصد الأرواح ويروح من غير "من وين رايح من وين جاي"

صحيت ع جنون انرسمله أسهم دخول تفضل معي ع البداية

العالم قنعنا أنه في دولة قالولنا في سلطة

يلا شرفونا بديمقراطية يلا بفلسطين في انتخابات حرة

استنا! بعقلي في علامة سؤال تضوي بقوة

منذ متى ألديمقراطيه بتيجي قبل الحرية؟ سألت الأمة

بس سؤالي طفا قبال ضواو الكاميرات عشان
كأنه عأفى مين يشيل ع الأحداث مسلطين العدسات

الشعب ماسك ورق عشان اليوم يوم عطلة في

انتخابات الكل مدندن تقول بدينيه سامع طرب بطريقه للبوكسة

العالم حضر تمثيلية وإحنا مثلناها منيح

فريق نزل فريق طلع طيب فريق لازم يزيح

التمثيلية كان إلها نهاية مفاجئة العالم فكر ما تصير

زعلوا منا صارت مقاطعه أنا بناديها تهذيب



شادية منصور لازمة

بدي سلام

بدي سلام

بدي سلام

بدي سلام, كنا بدنا سلام مع العدو هلأ بدنا سلام مع حالنا








محمود جريري

العالم قرر يعاقب شعبي يخاطب شعبي

أكنوا ولد صغير شكله مزحنا ع الثقيل

وإحنا مفهمناش أيش بصير, هيه! ليش الجماعة زعلانين

غريب عجيب فكرتهم مكيفين ع تقرير المصير

الوجه المفرود لبس ثوب التكشير

اقتراعنا مرفوض ألمقاطعه تحت التنفيذ

تقول الاحتلال العقود ما كفى فنفوذ العالم

يد واحده التفت وبفلسطين الجوع أتفشى
وإحنا جعنا فتوحمنا على لحوم بعضنا

طعجنا بواز الفرود على وجوهنا وعلى الزناد ضغطنا عصرنا قتلنا

إسرائيل خلص تتعبيش إحنا بنصفي حالنا بحالنا

والأمهات تبكي عشان ابنها نقتل من إلي كانت تناديهم أزلامنا



شادية منصور لازمة

بدي سلام

بدي سلام

بدي سلام

بدي سلام, كنا بدنا سلام مع العدو هلأ بدنا سلام مع حالنا



محمود جريري

هلا العالم شافنا وبما انو موجهن

فبعلامات المفاجأة كان يتفنن قنعنا انو هو بتألم

مسكين! خضينا بأعمالنا البربرية هو

من العالم المتحضر متعود ينسف طريق غارات جوية

متعود ميطلعش ميتأملش بعينين الضحية

يتحملش المنظر فتحضر وصار عنده مذابح أوتوماتيكية

وهلا عامل حاله زعلان على الوضع ع القضية

يبكي بعين والثانية مشغلها يغمز الصهيونية

يا فلسطينية أصبح عندي الآن بندقية

فخذوني معكم بس مش لحرب أهلية

فلتوا العصبية في البيت إحنا مش ناقصين يا عم

أطلقتوا سراح الجاهلية في الوطن والجاهليه أعطتنا دم

شفت جنون راح ينكتب بتاريخ سم

كله مسموم وإحنا نحمي معلقه فيها سم

نأخذ جرعة ونمشط ونرش كنا بدنا سلام مع العدو

هلا بدنا سلام مع حالنا نمشط ونرش



شادية منصور لازمة

بدي سلام

بدي سلام

بدي سلام

بدي سلام, كنا بدنا سلام مع العدو هلأ بدنا سلام مع حالنا