[Texti fyrir "Bólivar"]

[Vísa 1]
Karlar sjö úr öllum áttum
Eiga hafnarfrí
Fullir inn á fyrstu knæpu
Frjálsir menn á ný
Við skulum drengir drekka og slást
Dreypa á stelpurnar
Við sem yfir Fetlaflóa
Fleyttum „Bólivar“
Rambaði hann í hvítum mekki
Hrikti í nagla og ró
Kolin uppi, laus í löðri
Lestin hálf af sjó
Lekadallur djöfuls sleði
Dæmdra manna far
Svona út á Fetlaflóa
Flaut hann „Bólivar“

[Vísa 2]
Baksaði eins og særður sjófugl
Sífellt út á hlið
Umdi og glumdi eins og smiðja
Ágjöf hverja við
Aðeins stromp og eina siglu yfir löðrið bar
Svona var um Fetlaflóa
Að fleyta „Bólivar“
[Vísa 3]
Sjó um þilfar, kol um kjalsog
Kuggsins fyllti í senn
Skinn úr lófum, frosnir fætur
Feigðartrylltir menn
Fari hann þá sem fyrst í víti
Fái hann lending þar!
Loks varð bæn á Fetlaflóa
Fyrir „Bólivar“

[Vísa 4]
Aldrei hvíld – í hæsta lagi
Hálfmók andartak
Ryðnaglarnir sviptust sundur
Súð og þilfar lak
Áttavitinn elti skott sitt
Eins og köttur snar
Það var syðst á Fetlaflóa
Á ferð með „Bólivar“

[Vísa 5]
Skall þá yfir skell að aftan
Skipstjórinn hló og kvað:
„Hjólið fór til vítis vinir!
Vindurnar af stað!
Festið strax úr stýrishausnum
Streng á trissurnar!“
Svona loks um Fetlaflóann
Fleytt var „Bólivar“
[Vísa 6]
Eins og brenglað, beyglað, hrúgald
Bik og ryð í graut
Baksaði hann til Bilbaó
Með bilað stýri og flaut
Ræflum sjö á hripið lögðu
Í hinsta ferðalag
Drottins storma tókst að trompa
Og taka af Ægi slag!

[Vísa 7]
Karlar sjö sem voru í víti
Vappa í land á ný
Fullir inn á fyrstu knæpu
Frjálsir menn á ný
En hvernig er með eigendurna
Er eigi gleði þar?
Yfir því að heim í höfn
Komst hripið „Bólivar“?