Nú andar suðrið sæla vindum þýðum
Á sjónum allar bárur smáar rísa
Og flykkjast heim að fögru landi ísa
Að fósturjarðar minnar strönd og hlíðum

Ó heilsið öllum heima rómi blíðum
Um hæð og sund í drottins ást og friði
Kyssið þið bárur bát á fiskimiði
Blásið þið vindar hlýtt á kinnum fríðum

Vorboðinn ljúfi fuglinn trúr sem fer
Með fjaðrablik og háa vegaleysu
Í sumardal að kveða kvæðin sín

Heilsaðu einkum ef að fyrir ber
Engil með húfu og rauðan skúf í peysu
Þröstur minn góður það er stúlkan mín