[Verse 1]
Tagistis ng ulan sa aking bintana
Anino ng sangang hinagkan ng buwan
Sa bawat sandali'y gising ang gunita
May iginuguhit na multong balangaw
Diwa'y sinisidlan ng libong larawang
Parang mga bulang mabuo-malusaw

[Verse 2]
Ang alaala mo'y bulang kinikimkim
Inaaring hiyas na kukuwintasin
Iniisa-isa ang mahal na butil
At binubuhay ka sa piping dalangin
Sa pag-aakalang ako'y maaliw
Ang pangungulila'y lalong pinatalim