[المقطع الأول]
يا إللي بين كل نجمة ونجمة إمتى هتحنيلنا؟
سكننا إلليل بالنيكوتين والقهوة يمكن تسمعيلنا
عشان حلاوة الحب واقع بقى الحزن ملة
ما حدش داق حلاوة الحب إلا وإنضملنا
إحنا كتير وبنعرف بعض لإن عيوننا ما بتخبيش
ما بنتسألش مالكوا من فراغ لكن بنقول مافيش
إحنا التذكرة الواحدة وسط زحمة الإتنينات
إحنا الخميس بتاعنا ما يختلفش عن التلات
إحنا صمت أقوى من الكلام تعبيراً عن صاحبه
إحنا إللي بيتزهق منه وبيتقال سيبوه على راحته
إللي بنحسد إللي رافع راسه مع إنه هيتكسر
إللي ماشي باصص تحت رجله ويخبط فيك يعتذر
يا إللي بين كل نجمة ونجمة إوعي تكوني سراب
سكان الليل في الأرض بسببك متشافين أغراب
يا إللي بين كل نجمة ونجمة إوعي تخذلينا
ما حدش فينا إتعلم إنه يعوم يا سفينة

[اللازمة الأولى]
لعله خير، شر حامينا من الأشر
يمكن أحسن ركوبة لينا ركوبة المضطر
يمكن قدرنا الأب بتاع بعمل ده لمصلحتكوا
لعله فقد ما نملك لإمتلاك ما نستحقه
لعله خير، شر حامينا من الأشر
يمكن أحسن ركوبة لينا ركوبة المضطر
يمكن قدرنا الأب بتاع بعمل ده لمصلحتكوا
لعله فقد ما نملك لإمتلاك ما نستحقه
[المقطع الثاني]
يا ساكنة الضفة التانية جايلك، مش هتأخر
كل شيء في حياتنا لمقابلتنا كان متسخر
إللي عشته أنا وإنتي أرض صلبة نبني حياة عليها
علاقتنا غاية الكون بيدور ودار حواليها
ما تفقديش إيمانك بيا، ولا تشكي للحظة فيا
لو هضحي بكل حاجة مقابل حاجة، فإنتي هي
من أرض الخوف بحدفلك طرف أول خيط يربطنا
بنكلم نفس النجمة في نفس الوقت ودي مش صدفة
يا كعبة عيني وعينها بشريها بيا
إلهميها بكونها مش وحيدة وإللي فيها فيا
إرسميني قصادها في السما وسيبيلها هي الباقي
ما حدش طارد حلم يقظة أكتر من هوائي
يا ساكنة الضفة التانية وجودنا في القاع أمل لينا
بكرة مش هيلاقي حاجة ياخدها منا فهيدينا
يا ساكنة الضفة التانية العرش والتاج في إنتظارك
وصلينا بسرعة يا أرض، لقانا نقطة على مدارك

[اللازمة الثانية]
المرة دي مش غريق في عرض أول قشة تظهر
المرة دي المرسى نقطة قصادي، كل ما أعوم بتكبر
مؤمن في كل وقت، متأكد لو فيه علامات
بمشي ورا إحساسي دايمًا، إنتوا بتمشوا وراه ساعات
المرة دي مش غريق في عرض أول قشة تظهر
المرة دي المرسى نقطة قصادي، كل ما أعوم بتكبر
مؤمن في كل وقت، متأكد لو فيه علامات
بمشي ورا إحساسي دايمًا، إنتوا بتمشوا وراه ساعات
[المقطع الثالث]
أخيراً إتقابلنا وش لوش بدون وسيط
كل حاجة زي ما السما وصفتلي بإختلاف بسيط
طبيعي إن إحنا دوبنا تحت أول ليل قابلنا
حبنا لبعض إتولد قبل أول نظرة بينا
إحكيلي تاني كل حاجة حتى لو عادية
ده أنا بشوف نفسي فيكي أكتر ما أنا بشوفني فيا
كل بحبك كنت بقولها لحاجة منك في إللي قبلك
يعني كل كلام الحب إللي أنا كتبته ده إتكتبلك
بتأمل حياتي وهي بترسم سندريلا فيا
أثناء ما حياتك على التوازي بتشكلك هي
مستحيل تكون دي صدفة، جايز تطلع دي نظرتي
ما أنا نحات وخلق معنى من لا معنى دي شغلتي
أحكيلي جديد وأنا هنحت تماثيل جداد
عايز كل يوم نعيشه يبقى أسعد من إللي فات
طب نعمل حاجة جديدة ما دام مافيش حاجة تقوليهالي
مش عارف ليه زهقان، يا خوفي ليكون إللي في بالي

[اللازمة الثالثة]
إوعى تواجه الموهوم بشيء بإن شيئه إختفى
مافيش أصعب من الغروب ع إللي متعلق بالدفا
ساعات لازم نعيش وجع وصدمة إنهيار أوهامنا
عشان نشوف حقيقة صعب حد يوريهالنا
إوعى تواجه الموهوم بشيء بإن شيئه إختفى
مافيش أصعب من الغروب ع إللي متعلق بالدفا
ساعات لازم نعيش وجع وصدمة إنهيار أوهامنا
عشان نشوف حقيقة صعب حد يوريهالنا
[المقطع الرابع]
رفضنا نصدق إن نهاية القصة إبتدت
فضلنا بنرقص مع إن المزيكا إختفت
حاولنا نفضل سوا بكل وسيلة وكل حيلة
خلقنا بديل لكل بديل لكل خطة بديلة
فإبتدى الملل وإبتديت أشوف عيوبك
وبدأت أحتاج مساحة لنفسي وأستتقل وجودك
وإضطريت أداري ده بكلام ما كانش من جوايا
فإبتديت أشك في حبي ليكي أصلاً من البداية
إحنا في محنة بس بنحلم والميت في حلمه حي
من أول يوم فرحنا وأنا قلقان من إللي جاي
مش تشاؤم ولا كآبة ولا مستكتر إني إرتحت
بس للي في أعلى نقطة أي طريق هيكون لتحت
يا إللي بين كل نجمة ونجمة جيتلك، ما إتأخرتش
بعترفلك إني أحتاجت أتحب وأحب فـ ما فكرتش
يا إللي بين كل نجمة ونجمة إيه المشكلة في كده؟
أكيد مسيرها تصيب، من فضلك إوصفيلي غيرها

[اللازمة الرابعة]
مش كل البدايات سعيدة ومش كل النهايات حزينة
مسيري هكتب غنوة كاملة تحبي تسمعيها
وحتى لو موهوم، الوهم بكل طاقتي أولى
على الأقل يتكتب على قبري نال شرف المحاولة
مش كل البدايات سعيدة ومش كل النهايات حزينة
مسيري هكتب غنوة كاملة تحبي تسمعيها
وحتى لو موهوم، الوهم بكل طاقتي أولى
على الأقل يتكتب على قبري نال شرف المحاولة