"كلمات كمال مسعودي "ما بقاتشي رجلة
اضغط هنا لقراءة المزيد من كلمات وقصائد الشعبي الجزائري

[لازمة] (x2)
ما بقاتشي رجلة في ذا الزمان، ما بقات الكلمة
غير كترت الهدرة باللسان وفعايل معدومة

خارج من دارو كي تشوفو تنخلع
يظهّر في نيابو يزهر كي السبع
يقول من عندي ومن بعدي تنقطع
ما قنع في حياتو عمرو لا شبع
يجي عندك يحضر كي تكون فالوسع
ونهار تضياق عليك تقول ما سمع
قال كلمة واليوم عليها رجع
طاح قدرو فالحومة
طاح قدرو فالحومة

[لازمة] (x2)
ما بقاتشي رجلة في ذا الزمان، ما بقات الكلمة
غير كترت الهدرة باللسان وفعايل معدومة

واحد باقي ساكت تقولشي مخاصم
ويقول أنايا نتكلم غير كي توالم
ما نفع روحو لا غيرو بشي كلايم
الباطل صاير قداّمو بالعرارم
إذا نطق وتكلم يهدر كي الحاكم
داخل في سوق الجملة بلا دراهم
ناس بكري شطحت ورمات المحارم
وين تبانو انتوما
وين تبانو انتوما
[لازمة] (x2)
ما بقاتشي رجلة في ذا الزمان، ما بقات الكلمة
غير كترت الهدرة باللسان وفعايل معدومة

يربّع فالمشية رجلاوي حذر
يقول أنايا نمشي غير بالقدر
عايش بالحيلة عام وطناش نشهر
ما يفرّق بين اليابس والخضر
بين الأمة يرفع صوتو بالجهر
إذا تحطّو وسط الشهدة يعود مر
عينو تلعب من فوق للتحت كي النسر
ما يقادرش الحرمة
ما يقادرش الحرمة

[لازمة] (x2)
ما بقاتشي رجلة في ذا الزمان، ما بقات الكلمة
غير كترت الهدرة باللسان وفعايل معدومة

يبرم في شلاغم ومهيّل الرواح
إذا تصبّح عليه ما تشوفش الربح
(يالطيف)
في الوجه يضحكلك منو تستراح
كي تغيب في ظهرك يشير بالسلاح
تقول زاوش قرمود مقابل السطح
ولا ذيل السردوك يميل مع الرياح
يا الله استرنا من القوم الجياح
خوذ بالحق فالأمة
خوذ بالحق فالأمة
[لازمة] (x2)
ما بقاتشي رجلة في ذا الزمان، ما بقات الكلمة
غير كترت الهدرة باللسان وفعايل معدومة