يا إسكندرية بحرك عجايب
ياريت ينوبنى من الحب نايب
تحدفنى موجة على صدر موجة
والبحر هوجة والصيف مطايب
اغسل هدومى يا إسكندرية
وانشرهمومى يا إسكندرية
على شمس طالعة وانا فيها دايب
كأنى فلاح من جيش عرابى
مات ع الطوابى وراح فى بحرك
كأنى نسمة فوق الروابى
من البحر جاية تغرق فى سحرك
كأنى كلمة من عقل بيرم
كأنى غنوة من قلب سيد
كأنى جوة المظاهرة طالب
هتف بأسمك وراح معيد
ياإسكندرية يا مصراوية
على سن باسم
على ضحكة هلة
البحر شباك ومشربية
وانتى الاميرة ع الدنيا طلة
وفيكى خمرى يا اسكندرية
سلمت أمرى يا اسكندرية
مقدرش اشوفه
وما اغنيلوش
يا إسكندرية عاشق وبدى
ارتاح فى حضنك الود ودى
يكون كلامى عربون غرامى
وبالمحبة ناخد وندى
يا إسكندرية فيكى الغلابة
ع الرزق يسعوا ولا يناموش
نزل شبكهم فى بحر طامى
طلع شبكهم على فشوش
وفيكى بين البشر ديابة
وفيكى فوق البشر وحوش
وفيكى ناس مغرمين صبابة
لو خان زمانهم ما بيخنوش
وفيكى خمرى يا اسكندرية
سلمت امرى يا اسكندرية
مقدرش اشوفة وما اغنيلوش