Walli f aɣ ibla Ṛebbi, hann keyyi ka f allaɣ !
Ur riɣ lfrac a(d) t igan d win lmlef lḥuṛṛ
Ur riɣ lɛcert n bab (n) lmal, a(d) ten issan
Ur riɣ amɣar a(d) ten neg, a(d) newulu limuṛat
Ur riɣ abla a(d) yyi d-aḍun willi kullu sseneɣ

Luḥ a lxir amud nnek nessut, nesusit !
A(r) lliɣ immɣi wamud ar netmgger s lɛaṛ
Afṛẓiẓ d umajjleb ifser ar akal
Iqqen targwa lli yyi d-issṛuḥn tassiwin
Htta llimun d lɣwnbaz ur sul ra(d) ttarun

A ffuɣ, a lɣuf, a(d) k id ur yaf lfreḥ iɣwi k !
Ullah a mek negi ma ɣ a(r) ttmunem sin itun !
A Llah a Ṛebbi, tagat ḥaqqan is sul ur llant !
A tutt walli giɣ ittxwmmarn sul ar ittanef
Inna ɣ d-is maggareɣ isker is iɣ ak ur issen

Ittu lxir lli d-is necrek ula tamunt
Awin ten wiyyaḍ ur sul kcemeɣ i limuṛ nnes
Necca ten lliɣ iga tteṛi, neluḥ ifrkki nnes
Ur aɣ sul ihul acku nekkis askaren nnes
Illa lɛin ijudn ɣ tama nu sul ufen wines
Igan win ljdid, ur ta issen aman nnes
Ula kra mad g-is issliliyn tifassin nnes
Nekki ad d g-is ittuḍḍan, cuwweṛeɣ as ar ten inn-neqqen
Imma lɛin lli dar-k ur mmimen waman nnes
Iggut g-is iṛiẓ ur sul ila ccan neḥaca ten
Lliɣ telkemen igaywaren, kkisen ccaṛaf nnes
Neɛahd ad ak Ṛebbi a yan k iran, irin awal nnek
Irin g-ik lɣṛeḍ nnes a(d) kwen ccin, ar kwen issumen
Yan ixdemn lbiɛ-u-cra (n) lksut ar tenakaṛn
Yan isɣan lḥaja s miyya ar ittini mitayyn
Ar ittgalla s Ṛebbi ayni telkem laṛsmal nnes
Awin g-ik uggar n mnaṣṣa a(d) ten ccin, iḥrem asen !
Neddu dar yan izzenzan tamment nniɣ as, menckk ?

Neddu dar yan izzenzan tamment nniɣ as, menckk ?
Inna mḍi bɛda lasrar a(d) tawim tamaxirt
Aynna terit neggal ak fell-as awi tt ur tt nakeṛeɣ
Xlleṣeɣ as lmnjeṛ n tamment nekki nniɣ amumen
Ɣar iɛjen sanida ɣ waman iffi tt ɣ waṭṭas
Ig as tasrgwelt yan tentt iccan ineɣ t unusm
Idda ṣṣfa, id bab nnes a(d) sur illan, mmutten
Iga lɛin i medden fekan tt kullu i teciṭant
Ula lḥasada d lkṭeṛt n cciki iskufeṛ ten
Wanna rad ẓeṛan lmal aɣ ann-smuqqulen
Iɣ a(r) isawal ajjin ar isawal, ḥtaṛmen t
Waxxa tt ka ibbi g-isen ar ttini inna ṣṣaḥt
Ass-ann ra (d) asen ɛrḍen s tiremt a(d) fell-as iḥiyyel
Awin-d izimmer ɣresn as n xemsa-alaf, isres t
Awin-d ifullusen d iqqwlilen kullu issnwa ten
Yawi-nn ɣar inmɣuren iɣ ccan a(d) t ttenṣaren
Yawi-nn s-is Ṛebbi yan lxleqq ur iṭṭaf imnsi nnes
Ar isduqqur aggur, laḥ mani ttṛwaḥn
Inna i asen-d : aggwa ten mad ittenaqqarn turrim-d
Iɣ awen inna illa ɣ-inna felan ini at as ur iḥader
Lger-nn aggur f umksa, ad yyi tt ur iṭṭiyyer
Ad d ur ifel iggurdan ɣ lmaḥal inu d tellict
Aḥḥ a ddriwec ! Mad ak sul innan a (y) amar !
Iffuɣ k id lɣṛeḍ ur sul ira yan awal nnek
I Ṛebbi a (y) ifllaḥen, eg at yan ɣ ya(n) wawal !
Mun at i lhemm ar ttenḍḍamen limuṛat nnun !
Tafllaḥt ur mgaddant a walli tt iran
Ad nit iṣber ɣ ljibb nnes, iṭṭef lalufat
Aynna gan qqaddant iɣ illa ttaman
Ad ur isker ddin iggutn, ar ismrway

Ad ur isker ddin iggutn ar ismrway
Iɣwi ssalaf, iḍi-d lfyaṭṭ, ar ittelulluy
Inna (y) ak ɣ mek-ad nega ur illa wanaw nneɣ
Ma g-is isker cciki d uxmum a ccikkat alef
A(r) lliɣ iqqama ɣ ljibb xemsin n ryal

Ad d nn-iṛuḥ tigemmi, gwnen ɣ lkacca
Ar allan, ar nddern zund aɣwi d unfus ar ittamum
Tacaga n ɣay-lli dar-s illan ikmmel t
A(d) t ihlekn, iggammi ad kkw sul iṭṭay awal
Igan aqqḍiɛ n xizzu imlek t akkw umusay
Maṭica gan ttin ihlek asen tt akkw lfil
Axsay idi-d sin ifrawen iqqar
Ig as lggwanu ḥregen t iliḥ as aman
Yawi-d aɣyul s tugas iri a(d) t issanun
Ɣar s ijbed, ibbi ils, yawi t ulukaf
Ijjuṛṛu t s usggred, isri kullu, mmuttln
Inna : wakk wakk, lkibber nneɣ ifeka yyi i lakuṭ
Iga (y) aɣ d umẓlud, ur sul neṭṭaf lmal
Ur jju nesuqq ula ad nekk mani, is akkw netelf
Ljibb ixwa, id bu ddin kul yan iqqel siɣ
Ad d-is nesker lḥsab, nesmun t ɣ lkwnnac
Lajal n ssalaf idda ikmmel, maɣ ufiɣ
Ma s nettexllaṣ, ajj aɣ yuf iɣ akkw nerur
Iwin tinfal n ssizi, iwin aɣ lmaḥal
Awin lfyaṭṭ (Fiat, neggawer, neqqama aḥmmal
Nega ṭaleb-mɛacu, ɣil ma yyi sul iran ?
Ar neggwan ɣ lgaṛaj ar kiɣ ifaw lḥal
Lkaṛ iɣ ra(d) iffuɣ alleɣ as lkuliyat
Imma yan icuwwṛn isber ig-nn timiṭac nnes
Inna ur lkemn, Ṛebbi ad asen t ur isslkemn !
Ig-nn lxḍwṛt isrɛit, ar tt isusuy
Ayyur wiss sin, inna rad asen telkem yawi tt

Ig tt i lkṛṛuṣa ɣwin xemsa-alaf ryal
Ig ten-inn ɣ ljibb idus ten s lfililat
Iɣ ira rad ggeren i laẓ, iftu, ar ittemciwwiṛ
Netta d ixf nnes is rad ikkes a(y)-lli ṣiyyern
Inna bark-Llah nejjaw, nesmeḥ i tiremt
Ad lkemeɣ tigemmi g-is nit atay nesu t
Netta d uɣrum n temẓin yuf aɣ lkumir
Ra(d) t necc, neṣber bezziz ar kiɣ neṭṭaf lmal
Lɛaraḍa iɣ teṛeẓa a(d) ur ilan asafar
Ass at aḥlig s tuggas, murran, iɣ isuqq !
A(d) ad kwen ur isdullu f ibawwen ula tinaffin
Ula tiyyni ! Aḥbbuḍ, ad kwen ur isnḥiccim !
Lxleqq iɣ g-is ur lhemm, ul nnes is immut
Ula ssiɛr n tegadda nnes ad ismun lmal