El Joker - الجوكر
Adreen - قادرين
[المقطع الأول]
بنواجه الفشل بإيمان واليأس بعزيمة
مادام مبطلناش نحاول ما إسمهاش هزيمة
مش ندمانين على حاجة وده عشان إتعلمنا حاجة
مفيش حاجة ببلاش والدنيا مش ماشية بمزاجك
قادرين نحس بدفا الشمس من ورا الغيوم
قادرين نحس كتافنا بتقوى من شيل الهموم
بنشوف الميزة الواحدة رغم كل عيوب الصورة
قادرين نحمل على العضمه اللي لسه مش مكسورة
وعشان بشر ساعات تضيق، نقول شكلها إتسدت
تقع كام طوبه وإحنا مجهدين، نقول إتهدت
ويدور جوانا صراع هنقدر ولا مش هنقدر
نسيب نفسنا نلاقى أصوات الإحباط بتكتر
نفتكر أول حب وقد ايه إتمسكنا بيه
والوقت اللي ضاع في وهم إن الحياة إنتهت بعديه
نضحك على قد إيه إحنا كنا صغيرين وقتها
قد إيه الحياة كانت سهلة وبرضه قلنا مش قدها

[اللازمة]
عاندي فينا أكتر، لسه فينا حيل نعاندك
تيجي فينا إيه يا دنيا، ورينا اللي عندك
أقفي بيننا وبين هدفنا وأخريلنا ساعتك
هنوصل في الميعاد ونحتفل داخل ملاعبك
عاندي فينا أكتر، لسه فينا حيل نعاندك
تيجي فينا إيه يا دنيا، ورينا اللي عندك
أقفي بيننا وبين هدفنا وأخريلنا ساعتك
هنوصل في الميعاد ونحتفل داخل ملاعبك
[المقطع الثاني]
ساعات عشان نرتاح بنشاور على الأسوأ مننا
لما كل ده يتعدل نبقى نعدل من نفسنا
جوانا نص نفسه يريح، نص نفسه يكمل
نص قادر يواجه، نص مش عارف يتحمل
نص عايز يفضل يقوى لحد ما يوصل للي عازه
ونص عايز الدنيا تتفصله على مقاسه
نضعف منستسلمش، نميل مننحنيش
تشوفنا محبطين، تقول إنتهوا، مننتهيش
حالفين يطرح طموحنا حتى لو مكانش الموسم
من كل المحدوفين في بير لا يذكر إلا يوسف
أكبر من الرضا بقليل بسبب خوف ورعب
عمرنا ما نخاف لمنلاقيش فنرضى ناكل طعم
جواك مقومات الفوز لكن محتاج تآمن
إن وجودك في حد ذاته دليل على إنك قادر
ربك، الطبيعة، أو اللي مؤمن بيه عامة
ما أوجدكش صدفة، والعالم دليل ومثل

[اللازمة]
عاندي فينا أكتر، لسه فينا حيل نعاندك
تيجي فينا إيه يا دنيا، ورينا اللي عندك
أقفي بيننا وبين هدفنا وأخريلنا ساعتك
هنوصل في الميعاد ونحتفل داخل ملاعبك
عاندي فينا أكتر، لسه فينا حيل نعاندك
تيجي فينا إيه يا دنيا، ورينا اللي عندك
أقفي بيننا وبين هدفنا وأخريلنا ساعتك
هنوصل في الميعاد ونحتفل داخل ملاعبك